Già di multu tempu la pussibilitati di faciri divintari lu sicilianu lingua ufficiali di la Regioni Siciliana è supra a la vucca di multi attivisti culturali e puliticanti in Sicilia o inta lu  parlamentu di la Ripubblica Italiana.
Autri regioni – comu la Sardigna, lu Friuli-Venezia Julia o lu Vaḍḍu d’Aosta – sicutaru chista pruposta, agghjicandu a lu ricanu- scimentu di li propi parlati regionali di parti di lu Statu Italianu e a falli cummigghjari midemma pri leggi.
Ma d’arredu a tuttu chistu, vi àvi stata una longa lotta culturali e pulitica ammuttata di parti di multi associazioni di chiḍḍi terri.
Una intra chiḍḍi principali cca in Sicilia, e ca cchiussai travagghjau pri lu sicilianu, putemu mintuvari “Cademia Siciliana” ca già di multi anni cunduci chista grandi battagghja pri li  diritti linguistichi di li matrilingua siciliani.
Carchi jorna d’arredu àppimu manera di incotrari Nick Panzarella e Alessio Mistretta, dui attivisti di Cademia Siciliana ca ni schicaru tuttu chiḍḍu ca cc’è di sapiri supra a lu prujettu disegnatu d’iḍḍi pri la lingua siciliana.
Prima di cuminzari, cc’è macari di diciri ca già inta l’anni passati l’associazioni juncìu a grandi e impurtanti risultati, comu “l’attuazioni” (zoè, “a cunchiri un fattu linguisticu materiali”) di la lingua pri menzu di libri, calandari, pagini e siti internet.
Infatti, sutta a l’àmmitu editoriali, cci sarrannu assai novitati in futuru.
Pri parlari di chiḍḍu ca àvi gana di faciri chista associazioni, cc’è in primis di mintuvari una cosa assai impurtanti: Cademia nun disìa “koinizzari” (vali a diciri: faciri tabula rasa di tutti li dialetti in Sicilia) la lingua siciliana, ma custrujisciri una ortugrafìa cummuni pri tutti li parlati, purtandu pirò rispettu a tuttu chiḍḍu ca cc’è di diversu e unicu in tutti chisti.
Pri rendiri pussibili tuttu chistu cc’è pirò prima di jiri ultra a la “stereotipizzazioni” di la lingua, facendula divintari un fattu cutidianu ca va ultra a lu simplici parlatu infurmali e lijatu unicamenti a la famigghja o a li cumpari.
Propia pri chista raciuni, Cademia Siciliana è puru un fattu sociali. Sulu pri parlari di la Pruvincia di Giurgenti, inta lu 2024 fu signatu un memorandum intra Cademia
Siciliana e lu Leo Club.
In jugnettu 2025 – grazi midemma a la cullaburazioni di lu centru sociali di Palermu “Trinacria” –, fu urganizzata na simina supra a lu sicilianu in contrata Santu Liuni, a la quali
participau multa genti di la Pruvincia di Giurgenti e autri bandi di la Sicilia. 
Pri la stati 2026, l’associazioni urganizzau – sempri inzemmula a Trinacria – una classi di scrittura in lingua siciliana dintra lu campus di l’Universitati di Palermu.
Un autru tema assai impurtanti è midemma lu inzignamentu di lu sicilianu inta li scoli di la Regioni Siciliana.
Carchi annu d’arredu fu cunduciutu un sundaggiu di parti di Cademia dintra li scoli siciliani versu majistri e prufissura, e s’agghjcau a scòpriri ca assai ducenti sunnu intiressati o in favuri a la intruduzioni di la lingua a lu so  inzignamentu.
Supra a chistu tema nun mancaru comunca assai dubbi e contestazioni. Una di li dumandi ca cchiussai veni spiata è quali variatati di lu sicilianu sarrà inzignata dintra a li scoli.
In risposta, fu cchiù voti precisatu ca chiḍḍu ca si cerca di faciri (cussì comu dissimu antura carchi ringu d’arredu) è inzignari comu s’àvi a scriviri – sempri in rispettu a li vari dialetti – e
nun comu s’àvi a parlari.
Pi chista raciuni, l’associazioni sarrà dispunibili in futuru a la furmazioni di ducenti di sicilianu, macari si lu intiressi in primu locu àvi a essiri di la Regioni e di li Istituzioni. Cademia pubblicau midemma un manifestu pri la lingua. 
Chiḍḍu ca si disìa di faciri è ammuttari pri lu ricanuscimentu di la lingua siciliana di parti di la Regioni Siciliana e di lu Statu Italianu, puntandu cussì a la modifica di la Leggi N. 482 di lu 15 dicemmiru 1999 e a lu inzirimentu di lu sicilianu intra li lingui sutta tutela legali. Pri cuntribujisciri a zò, tutti li pajisa dintra lu territoriu di la Regioni Siciliana ponnu appruvari lu manifestu pri menzu di una dilibira di parti di lu propiu cunzigghju cummunali.
Unu di li passi cchiù impurtanti di tuttu lu prucessu sarrà l’appruvazioni di lu DDL di lu Gruppu “Popolari e Autonomisti” di parti di la Simplea Regionali
Siciliana pri la lingua, lu quali sarrà poi passatu a la Cammara di li Diputati di la Ripubblica pri la modifica di la Leggi N. 482. Pri chista raciuni, chiḍḍu ca disiamu faciri oji è mandari un missaggiu a l’amministrazioni di li cummuni di Rivela e Sciacca e a li propi junti cummunali: di frunti a una Europa ca ammutta sempri cchiussai a sarbari lu propiu patrimoniu e cultura, sarbanduli e facendu tisoru d’iḍḍi – midemma comu oppurtunitati pri lu territoriu –, juncìu l’ura puru pri li pajisa di la Prunvincia di Giurgenti di movisi pri lu ricanuscimentu e la cunzirbazioni di la lingua siciliana e di li soi parlati.
Chiḍḍa ca Cademia prisentau, infatti, è macari una grandi opportunitati pri jisari arredu lu patrimoniu populari di Sciacca e Rivela.
Sulu ricanuscendu e ripigghjandu li propi radica storichi e culturali una sociatati pò aviri una megghju immagini e pruspettiva d’iḍḍa stissa